Author Archive

ჯანმთელობის მსოფლიო ორგანიზაციის მიერ რეკომენდებულია Xpert MTB / RIF – სისტემის გამოყენება, რომელიც ნახველის გამოკვლევით ერთდროულად ტუბერკულოზის გამოვლენის და რიფამპიცინის მიმართ რეზისტენტობის დადგენის საშუალებას იძლევა ორი საათის განმავლობაში. ამ რეკომენდაციის შესაბამისად, აღნიშნული ტექნოლოგია პილოტური სახით დაინერგა თბილისში და დაიგეგმა მისი გავრცელება ქვეყნის მასშტაბით 2014 წელს. ამ ინიციატივას ერთობლივად მხარი დაუჭირა გლობალურმა ფონდმა და აშშ საერთაშორისო განვითარების სააგენტომ. გლობალური ფონდის ტუბერკულოზის პროექტმა შეიძინა დამატებითი ცხრა GeneXpert მანქანა, რომელიც ჩამოვიდა ქვეყანაში 2015 წლის დასაწყისში.  აშშ საერთაშორისო განვითარების სააგენტოს ტუბერკულოზის პრეენციის პროექტის მხარდაჭერით მოხდა აპარატურის მონტაჟი და ლაბორანტების მომზადება ყველა შერჩეული ლაბორატორიაში, მათ შორის, სასჯელაღსრულების დაწესებულებებში.

2015 წლის 7 თებერვლიდან 11 მარტამდე  9 Xpert MTB / RIF სისტემა დამონტაჟდა და დაავადებათა კონტროლის ცენტრის 7 ლაბორატორიის 16 ლაბორანტს (გორი, ახალციხე, თელავი, ბათუმი, ოზურგეთი, ფოთი, ზუგდიდი) და სასჯელაღსრულების სისტემის 2 ლაბორანტს ჩაუტარდა ტრენინგი.

2015 წლის 18 თებერვალს გაიმართა ქვეყნის საკოორდინაციო საბჭოს ახალი წევრების საორიენტაციო ტრენინგი. დამსწრე საზოგადოებამ განიხილა გლობალური ფონდის რეგულაციები და მოთხოვნები, კონცეფციის დოკუმენტების შემუშავების პროცესი, აივ/შიდსის და ტუბერკულოზის ეპიდემიოლოგიური მონაცემები; საბჭოს მოქმედების და საზედმახედველო ფუნქციის შემდგომი გაუმჯობესების შესაძლო მექანიზმები.

2015 წლის 18 თებერვალს საზედამხედველო კომიტეტმა განახორციელა ვიზიტი შიდსით დაავადებულ პაციენტთა დახმარების ფონდში. ვიზიტის მიზანი იყო გლობალური ფონდის დაფინანსებით მიმდინარე შიდსის პროგრამის მიმდინარე სტატუსი შეფასება

ტუბერკულოზისა და აივ-შიდსის საწინააღმდეგო ღონისძიებების განხორციელებაში საქართველოს არსებით დახმარებას უწევს შიდსთან, ტუბერკულოზსა და მალარიასთან ბრძოლის გლობალური ფონდი. გლობალურ ფონდთან თანამშრომლობის გაგრძელებისა და დამატებითი დაფინანსების მისაღებად შიდსთან, ტუბერკულოზსა და მალარიასთან ბრძოლის ქვეყნის საკოორდინაციო საბჭოს ხელმძღვანელობით დაიწყო განაცხადების (ე.წ. კონცეფციის დოკუმენტების) შემუშავება. განაცხადები ყველა დაინტერესებული მხარის აქტიური მონაწილეობისა და დიალოგის რეჟიმში მზადდება. სამთავრობო და არასამთავრობო, აგრეთვე დონორი ორგანიზაციების, ადგილობრივი და საერთაშორისო ექსპერტების მონაწილეობით ჩამოყალიბდა ორი სამუშაო ჯგუფი. აივ/შიდსის ჯგუფი 2015 წლის 20 აპრილამდე შეიმუშავებს აივ/შიდსის, ხოლო ტუბერკულოზის ჯგუფი 2015 წლის 15 ივლისამდე მოამზადებს ტუბერკულოზის განაცხადს გლობალურ ფონდში წარსადგენად. საკოორდინაციო საბჭო მიესალმება არასამთავრობო ორგანიზაციების, განსაკუთრებით კი ტუბერკულოზითა და შიდსით დაზარალებული მოსახლეობის ჩართვას სამუშაო პროცესში. ჯგუფების შეხვედრები ღიაა და მასზე დასწრება შესაძლებელია ყველა დაინტერესებული მხარისთვის.

დეტალური ინფორმაცია გლობალური ფონდის დაფინანსების ახალი მოდელის შესახებ შეგიძლიათ იხილოთ შემდეგ მისამართზე: http://www.theglobalfund.org/en/fundingmodel/

შეკითხვებით და დამატებითი ინფორმაციის მოთხოვნით გთხოვთ მიმართოთ ქვეყნის საკოორდინაციო საბჭოს სამდივნოს:

ირინა გრძელიძე, აღმასრულებელი მდივანი. secretary@ccm.caucasus.net ტელ: 51 00 11 (0615);

ნათია ხონელიძე, ადმინისტრაციული ასისტენტი. admin.ccm@caucasus.net. ტელ: 51 00 11 (0616)